Ermal Meta e Fabrizio Moro fitojnë Sanremon

Ermal Meta ka shënuar një sukses të jashtëzakonshëm me muzikën e tij në Itali.

Ai sot ka fituar festivalin e mirënjohur Sanremo me këngën e tij në bashkëpunim me këngëtarin italain Fabrizio Moro “Non mi avete fatto niente”, transmeton Koha.net.

Ermal Meta bëhet këngëtari i parë që ka fituar Sanremon. Ndërsa kjo këngë do ta përfaqësojë Italinë në Eurovizion.

Ai lindi në Fier dhe prej moshës 13-vjeçare jeton në Bari, Itali me familjen e tij. Karrierën e tij e nisi si kitarist i grupit Ameba 4. Grupi konkurroi në kategorinë e të rinjve në Sanremo të vitit 2006 me këngën “Rido… forse mi sbaglio”.

Në vitin 2009, Meta formoi një tjetër grup, La Fame di Camilla, me të cilët realizoi tre albume. Në 2010-n, ai mori pjesë përsëri në Sanremo në kategorinë e artistëve të rinj. Përveçse këngëtar, ai është dhe një kantautor mjaft i talentuar.

Meta ka shkruar këngë për emra të njohur të muzikës italiane si Patty Pravo, Marco Mengoni, Emma, Giusy Ferreri etj. Gjithashtu, ai ka shkruar dy këngë “Tutto si muove” dhe “Volevo perdonarti, almeno” për serialin televiziv Braccialetti rossi.

Në vitin 2017 ai konkurroi për herë të tretë në Sanremo, por për herë të parë si solist. Kënga e tij “E ndaluar të vdesësh” u konsiderua si një nga krijimet me tekstin që përcillte mesazhin më të fortë në këtë festival ku ai zuri vendin e tretë.

Meta u rikthye në Sanremo 2018 në duet me Fabrizio Moron, por nuk u shpëtuan polemikave. Kënga e tyre u pezullua pas akuzave se ishte e vjedhur. Në fakt bashkautori i këngës Andrea Febo pranoi se kishte marrë një pjesë nga refreni i një kënge të prezantuar në Festival 2 vjet më parë e cila nuk ishte pranuar dhe që nuk ishte publikuar. Sipas tij, kjo ishte një këngë krejt tjetër me një përmbajtje dhe fabul tjetër. Tashmë kënga është një himn kundër akteve terroriste. Pas 36 orësh drejtuesit e festivalit e kthyen këngën në garë dhe ajo arriti të triumfojë, duke përfaqësuar Italinë në Eurovision.

Ky ishte momenti kur Ermal Meta e Fabrizio Moro u shpallën fitues.

Shpërndaje në